کراچی میں سمندری ہوائیں بند، درجہ حرارت 44 ڈگری تک جاپہنچا

کراچی میں سمندری ہوائیں بند، درجہ حرارت 44 ڈگری تک جاپہنچا

کراچی سمیت سندھ کے کئی اضلاع شدید گرمی کی لپیٹ میں ہیں جب کہ محکمہ موسمیات نے صوبے میں درجہ حرارت 50 ڈگری سینٹی گریڈ تک پہنچنے کا امکان ظاہر کیا ہے۔ 

محکمہ موسمیات کے مطابق کراچی میں سمندری ہوائیں بند ہوگئیں جب کہ 3 بجے تک درجہ حرارت 44 ڈگری سینٹی گریڈ ریکارڈ کیا گیا ہے۔

محکمہ موسمیات نے خبردار کیا ہے کہ کراچی میں شدید گرمی کی لہر مزید چند روز برقرار رہے گی جس کے پیش نظر پیر، منگل اور بدھ کو 'ہیٹ ویو' شدید ترین ہوگی۔ 

محکمہ موسمیات کے مطابق نواب شاہ، بدین، دادو، لاڑکانہ، اور سکھر سمیت سندھ کے کئی شہروں میں بھی موسم شدید گرم ہے جہاں درجہ حرارت 50 ڈگری سینٹی گریڈ تک پہنچنے کا امکان ہے۔ 

دن 3 بجے تک سب سے زیادہ درجہ حرارت چھور میں 46، کراچی، مٹھی اور شہید بے نظیر آباد میں 44 ڈگری جب کہ حیدرآباد  میں 42 ڈگری ریکارڈ کیا گیا۔

موئن جو داڑو 43، دادو، پڈعیدن، سکھر اور نوپورتھل میں 41 ڈگری درجہ حرارت ریکارڈ کیا گیا جب کہ منڈی بہاءالدین اور رحیم یارخان میں بھی درجہ حرارت 40 ڈگری ریکارڈ کیا گیا ہے۔

دوسری جانب اسلام آبادمیں 34 اور پشاور میں 33 ڈگری سدرجہ حرارت ریکارڈ کیا گیا جب کہ لاہور سمیت لاڑکانہ، اوکاڑہ اور قصور میں درجہ حرارت 40 ڈگری ریکارڈ کای گیا ہے۔

محکمہ موسمیات کا کہنا ہے کہ بلوچستان اور پنجاب کے میدانی علاقے بھی شدید گرمی کی لپیٹ میں ہیں۔ 

محکمہ موسمیات کی جانب سے آج مالاکنڈ، ہزارہ، پشاور، کوہاٹ، راولپنڈی ڈویژن، فاٹا، کشمیر اور گلگت بلتستان میں بارش کا امکان ظاہر کیا گیا ہے۔

احتیاطی تدابیر:

شہری ہیٹ ویو سے بچنے کے لیے احتیاطی تدابیر اختیار کرتے ہوئے بلاضرورت گھروں سے باہر نا نکلیں اور اگر گھر سے نکلیں تو سر کو ڈھانپ کر رکھیں۔ 

عوام شدید گرمی میں ہلکے رنگ اور ڈھیلے ڈھالے کپڑے پہنیں جو گرمی کے احساس میں کمی کے لیے مددگار ہوتے ہیں۔